MISAMIS ORIENTAL, Enero 27 - Nagmalampuson ug mabulokon ang nahitabo nga inagurasyon sa bagong Provincial Agriculture Complex sa Misamis Oriental didto sa Barangay Ane-i, lungsod sa Claveria.

Ang maong dakong kalihokan gisalmutan sa mga nagkadaiyang sector ug mga kaubang ahensya, mga Farm leaders, stakeholders, Misamis Oriental board members ug Misamis Oriental First District Congressman Christian Unabia, Gingoog City Vice Mayor Peter Unabia, PMFTC officials, ug ang amahan sa lalawigan nga si Governor Bambi Emano.

Mitambong usab via zoom, ang chairperson sa Senate Committee on Agriculture and Food ug Senate Committee on Environment and Natural Resources nga si Senator Cynthia Villar.

Sa maong kalihukan, misaad sa ilang dakung suporta ang pipila ka mga ahensya sa gobyerno ug pribadong sektor pinaagi sa ceremonial signing sa "Pledge of Support" ang mga dagkung lider gikan sa Department of Agriculture, Department of Science and Technology, Department of Agrarian Reform, Philippine Coconut Authority ug uban.

Sa susamang adlaw usab pormal nga gibindisyunan ang maong pasilidad nga maghatag ug dakong kausaban sa lalawigan kabahin sa higutanang agrikultural nga magpalambo sa probinsya ug mahimong Agriculture Powerhouse sa umaabot.

Ang maong dapit mahimo nga usa ka state-of-the-art nga pasilidad nga magtagana sa lain-laing mga teknolohiya sa pagproseso sa pagkaon sama sa pagpauga, pagbotelya, pagpreserba, ug uban pa gawas nga duna usab kini usa ka mini laboratory aron masiguro ang nutrisyon ug safety standards sa mga produkto.

Ug sa katapusan, ang pinaka-mahinungdanon nga serbisyo nga ihatag sa mga mga maguuma mao ang research. Ang sektor sa Agrikultura hingpit lamang nga mapalambo kung ubanan ug insaktong kaalam kauban sa integrasyon gamit ang mga modernong teknolohiya aron siguradong makabaton ug komprehensibo nga mga solusyon.

Gisiguro sa liderato ni Governor Bambi Emano nga mausab ug mapalambo ang natad sa agrikultura tungod kay iyang nakita nga daku ug potential ang lalawigan ug aron mapalambo ang kinabuhi sa mga maguuma sa Misamis Oriental.

Tumong sab niini nga mahimong food basket ang probinsya ngadto sa lokal ug langyawng merkado. (MisOr PIO)